தூறல்

சாலையில் மிதந்துசென்றது சுமையுந்து (லாரி)
ஓட்டுநரும் மிதந்துகொண்டுதான் இருந்தார்;
மிதக்கவைக்கும் உற்சாகப்பானம்.

ஃ

உயிர்பயம் ஒட்டிக்கொண்டது
பின்னால் வந்துகொண்டிருந்தது சுமையுந்து (லாரி);
நவீன எமன் வாகனம்.

ஃ

மஞ்சள் விளக்கு மிளிர்ந்தது
இதயம் படபடப்பாய் பந்தயமிட்டது இன்ஜினோடு,
எந்தவாகனம் முந்திச்செல்லுமோ?.

ஃ

குழந்தை சுகப்பிரசவமானது ஆட்டோவில்
மருத்துவர் அறிந்தால் வருத்தப்படுவார்;
ஆட்டோவிலிருந்தது “பிரசவத்திற்கு இலவசம்”.

ஃ

ஊர்ப்பயணத்திற்கு மட்டுமல்ல வாகனம்,
மறுஉலகிற்கும் மெல்ல அழைத்துச் செல்லும்
உமிழும் புகை.

ஃஃஃ

உன்னை நேசித்தது மனது
இருவர் வயதும் பொருந்தாத போதும்;
நட்பு.

ஃ

சந்தித்து நாட்களாகிவிட்டது
வேறு வேறு திசைகளும் சென்றாகிவிட்டது
குறையாமலேயே இருக்கின்றது நட்பு.

ஃ

குளம் வற்றிப் போனது,
வண்டலோடு ஒட்டிக்காய்ந்தது கருவாடுகள்;
மீனுக்கும் நீருக்குமான நட்பு.

ஃ

நாணல் கரையைக் காத்தது
ஓடைநீர் நாணலை தழுவிச்சென்றது;
பரஸ்பர நட்பு.

ஃ

எங்கும் வியாபித்திருந்தனர் என் உறவுகள்
உடன் பிறந்தோர் அதிகமில்லாத போதும்
நட்பின் வட்டம்.

ஃஃஃ

மேகமற்று துடைத்துவைத்த வானம்
வரண்டபூமியை குளிப்பாட்டிச் சென்றது மழை
எங்கோ தோன்றிய புயல்.

ஃ

பொட்டிழந்த நெற்றியாய் பூமி
மரங்களையும் பயிர்களையும் அழித்துச்சென்றது
புயல் காற்று.

ஃ

வியர்வைப்பூத்து நிற்கும் இலைகள்
தென்றல் தழுவவில்லையோ இரவில்?
இலையில் பனித்துளிகள்.

ஃ

அசையும் மரத்தைச்சுற்றிப் பறந்தது குருவி
நுணிக் கொம்பில் உட்கார்ந்திருக்கும் கூடு
கலைக்காதிருக்க வேண்டும் காற்று.

ஃ

எல்லாம் அதன் செயல்
எந்த இடத்தில் உட்காரவைக்குமோ?…
சருகைப் புறட்டும் காற்று.

ஃஃஃ

உறவினர்கள் யாராவது வருவார்களாம்,
மரத்திலிருந்து கரைந்து கொண்டிருந்தது
பசிமயக்கத்தில் காகம்.

ஃ

நீயும் நானும் உணரவேண்டும்,
ஒற்றுமையாய் இனத்தோடு பகிர்ந்துண்ணும்
காகம்.

ஃ

உணவு வைத்து காத்திருப்பர்
முன்னோர்கள் வருவார்களா என்று
காக்கை வடிவில்.

ஃ

கைமாறு அற்றக் கடப்பாடு,
குயில் முட்டைக்கு அடைகாக்கும்
காகம்.

ஃ

நேசர்படை சூழ்ந்து நிற்கும்
கூடுவிட்டகன்று பறக்கப் பழகும்
காக்கைக் குஞ்சு.

ஃஃஃ